Prakruciŭ cieła praź miasarubku — 17 hadoŭ, bienzapiłoj rezaŭ žančyn — 15. Za što ŭ Biełarusi raniej davali drakonaŭskija prysudy?
Siońnia hrupie palitviaźniaŭ — Cichanoŭskamu, Statkieviču, Łosiku, Cyhanoviču, Papovu, Sakavu — dali drakonaŭskija terminy ad 14 da 18 hadoŭ. Sud prachodziŭ u zakrytym režymie, hramadstva nie viedaje, u čym zaklučajecca vina hetych ludziej, jak jany źviazany pamiž saboj i jakija złačynstvy zrabili. Takija prysudy ciažka asensoŭvać i analizavać. Ale my možam uspomnić i paraŭnać, kali jašče i za što ŭ historyi Biełarusi ludziam davali takija terminy.
Napačatku 2020-ha minskija kamunalščyki znajšli ŭ Śvisłačy spartovuju sumku z čałaviečymi reštkami, akazałasia, što heta adrezanyja častki cieła žančyny. Jaje zabojcam byŭ 26-hadovy chłopiec.
Za toje, što jon zrabiŭ, jamu dali 14 hadoŭ kałonii ŭzmocnienaha režymu i spahnali kampiensacyju ŭ pamiery 220 tysiač rubloŭ.
A voś historyja 2015 hoda: užo sumnaviadomy Pavieł Ciniaŭski pjanym nakinuŭsia na svaju dziaŭčynu, spačatku ŭdaryŭ nažom, potym dušyŭ remieniem.
Jana pamierła, Ciniaŭski pazvaniŭ mamie.
Razam jany vyrašyli schavać ślady: Ciniaŭski nažom, siakieraj i bałharkaj rezaŭ cieła dziaŭčyny na kavałki, a jahonaja maci varyła ŭnutranyja orhany i prakručvała ich na miasarubcy. Niejkuju častku pareštak spalili ŭ lesie, niejkaj častkaj byli zabity truby ŭ domie.
Kolki im dali? Pavieł Ciniaŭski atrymaŭ 17 hadoŭ, ź ich pieršyja piać — u turmie, a 12 — u kałonii strohaha režymu. Jaho maci atrymała dva hady kałonii ahulnaha režymu. A taksama sud abaviazaŭ ich spłacić dva miljardy niedaminavanych rubloŭ maralnaj škody.
U 2016-m złavili ŭdzielnikaŭ połackaj bandy amaralnych złačyncaŭ.
Pres-sakratarka SK Julija Hančarova raskazvała, što ŭ spravie 50 achviar: čatyry abvinavačanyja znajomilisia z žančynami pačynajučy z 1999-ha, paili ich ałkaholem i snatvornym, pryvozili ŭ kvateru adnaho z bandytaŭ i tam hvałcili, ździekavalisia. Adna z achviar zahinuła — jaje zakapali ŭ karjery.
Sudzili bandytaŭ za zabojstva, zhvałtavańni, rabavańnie, hvałtoŭnyja dziejańni seksualnaha charaktaru, vykradańni ludziej.
Arhanizataru, Alaksandru Apieńku, dali 22 hady, saŭdzielnikam Ivanu Sierpuciu, Dźmitryju Dermiendžy, Anatolu Panfiłavu — 15, 12 i try z pałovaj hoda strohaha režymu adpaviedna.
Aproč taho, banda miełasia vypłacić 67 tysiač rubloŭ škody.
A pamiatajecie Uładzisłava Kazakieviča, studenta MITSO, jaki ŭ 2016-m pryjšoŭ z zaviedzienaj bienzapiłoj u HC «Jeŭropa», zarezaŭ hetaj piłoj žančynu, a potym pačaŭ bić inšych siakieraj?
Tady jaho spynili ludzi. Kazakieviča sudzili za zabojstva z asablivaj žorstkaściu, zamach na zabojstva, padrychtoŭku da zabojstva, chulihanstva.
Jon atrymaŭ 15 hadoŭ i 220 tysiač rubloŭ štrafu.
U temu złačynstva i surovaha pakarańnia možna ŭspomnić znakamituju «spravu siamnaccaci» — spravu sapraŭdnaha narkasindykata, jaki ŭznačalvaŭ vypusknik žurfaka Kanstancin Viluha.
Viluha adnym ź pieršych u krainie adkryŭ internet-kramu pa prodažy psichatropaŭ — miksy, spajsy na toj momant nie ličylisia zabaronienymi. A vizitoŭki pra heta razdavali prosta na vulicy.
Formuły psichatropaŭ zabaraniali, uładalniki internet-kramy prydumvali novyja. Abychodzić zakon udavałasia nie biez dapamohi. Ich kansultavali siłaviki, jakija rabili ekśpiertyzu kožnaj partyi narkotykaŭ.
Usie padrabiaznaści hetaj spravy nastolki žachlivyja, što tak i nie trapili ŭ publičnuju prastoru i nie dajšli da suda. Adnak na łavie padsudnych usio ž apynulisia 17 čałaviek.
Kanstancinu Viluhu dali 19 hadoŭ, jahonaj pamočnicy Alinie Cieryhiery dali 18 hadoŭ pazbaŭleńnia voli, Irynie Siemianiaka — 14.
Saŭdzielnikam z orhanaŭ taksama dali terminy: kadebešniku Dźmitryju Vieracienskamu dali dzieviać hadoŭ, Iharu Karyckamu — vosiem, stolki ž i supracoŭniku HUBAZa Kanstancinu Dzienisieviču.
Hetyja eks-siłaviki, darečy, užo na voli.
U 2017-m sud pastaviŭ kropku ŭ znakamitaj «spravie Mołnara» — babrujskaha bandyta, jaki hadami teraryzavaŭ horad.
Niekalki dziasiatkaŭ abvinavačanych, zakrytyja sudy: hetuju spravu orhany prezientavali jak najbujniejšuju i apošniuju spravu arhanizavanaj złačynnaści ŭ Biełarusi.
Banda Mołnara składałasia sa spartoŭcaŭ i zajmałasia kłasičnym bandytyzmam: vymahalnictvami, vydurvańniem kvater, rabavańniami, źviadzieńniem rachunkaŭ.
Što praŭda, nikoha nie zabili, ale losy pakalečyli mnohim.
Sam Siarhiej Mołnar, jakoha nazyvali «smatraščym za Babrujskam», atrymaŭ 18 hadoŭ. Jaho saŭdzielniki — pa 12 hadoŭ i mienš.
«Režymu nie ŭdałosia raździalić ludziej». Cichanoŭskaja ŭ kamientary «Našaj Nivie» pra prysud mužu
Darja Łosik pra prysud mužu: «Ja ni razu nie paškadavała, što Ihar moj muž, što ja addała jamu svajo serca»
«Mikałaj paŭtaraje: u ich niama stolki času, kolki jany spadziajucca». Žonka Statkieviča pra pryhavor mužu
Što treba viedać pra «spravu Cichanoŭskaha»
Cichanoŭski paviarnuŭsia da sudździ śpinaj, Statkievič kryknuŭ «Žyvie Biełaruś». Jak ahučvali prysud u SIZA-3 Homiela
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»9
Kamientary