Leanid Nieŭźlin nazvaŭ rasśledavańnie FBK «źlapanym u Maskvie źlivam»
Były top-mieniedžar JUKASa adchiliŭ abvinavačvańni paplečnikaŭ Alaksieja Navalnaha, jakija vypuścili rasśledavańnie, što biznesoviec zamoviŭ napad na palityka Leanida Vołkava ŭ Vilni, piša «Mieduza».
«Pa-pieršaje, ja nie maju dačynieńnia da jakich by tam ni było napadaŭ na ludziej ni ŭ jakoj formie. Pa-druhoje, padrabiazna abmiarkoŭvać detali hetaha zhatavanaha ŭ Maskvie «źliva» ja nie baču asablivaha sensu. Niachaj spačatku acenku hetym tak zvanym «materyjałam» daść niezaležnaje śledstva i, kali śledstva paličyć nieabchodnym, to i sud u demakratyčnaj krainie», — skazaŭ jon.
Nieŭźlin nazvaŭ abvinavačvańni ŭ svoj adras absurdnymi. Biznesoviec adznačyŭ, što dovady jahonaha dačynieńnia da napadu na Vołkava «vidavočna byli atrymanyja pradstaŭnikami FBK niepasredna z Maskvy». Pry hetym jon spasłaŭsia na toje, što pieršymi pierapisku Nieŭźlina, jakaja lehła ŭ asnovu rasśledavańnia paplečnikaŭ Navalnaha, apublikavaŭ rasijski prapahandyscki telekanał RT.
Biznesoviec śćviardžaje, što nie maje dačynieńnia da rasijskaj palityki i apazicyi. Pavodle jaho słoŭ, jon zajmajecca hramadskaj i vydavieckaj dziejnaściu ŭ Izraili, a taksama dapamohaj Ukrainie. Nieŭźlin abvinavaciŭ paplečnikaŭ Navalnaha ŭ tyražavańni «maskoŭskich źlivaŭ«, jakija, pa jaho acency,» całkam adpaviadajuć klučavym naratyvam pucinskaj prapahandy» ŭ tym liku ab 1990-ch hadach i aliharchach.
«Usia apošniaja dziejnaść FBK całkam vytrymanaja ŭ ramkach kramloŭskaj infarmacyjnaj palityki i adpaviadaje pastaŭlenym u śpiecsłužbach RF zadačam. Dla FBK, miarkujučy pa ich zajavach i dziejańniach, vajskovaja paraza RF i jaje imavierny raspad, razam z katastrofaj pucinskaha režymu, jaho ahienturnych sietak na Zachadzie i apustašeńniem šmatlikich kašalkoŭ Kramla — heta najhoršy scenar», — kaža jon.
Paplečniki Navalnaha abvinavacili Leanida Nieŭźlina ŭ tym, što jon zamoviŭ zamach na palityka Leanida Vołkava ŭ Vilni, a taksama datyčny da arhanizacyi napadaŭ na dyrektara FBK Ivana Ždanava ŭ Ženievie i žonku ekanamista Maksima Mironava Alaksandru Pietračkovu ŭ Arhiencinie.
Da hetaj vysnovy jany pryjšli ŭ vyniku rasśledavańnia na asnovie infarmacyi, dadzienaj Andrejem Matusam. Aŭtary rasśledavańnia nazyvajuć jaho» «rašalnikam» i čałaviekam z suviaziami ŭ rasijskich pravaachoŭnych orhanach. Matus śćviardžaje, što ŭ apošnija hady pracavaŭ na Michaiła Chadarkoŭskaha — siabra i biznes-partniora Nieŭźlina.
Chadarkoŭski zajaviŭ, što vałodaje źviestkami ab napadach na Vołkava, Ždanava i Pietračkovu tolki z adkrytych krynic. Kamientujučy abvinavačvańni ŭ adras Nieŭźlina, jon adznačyŭ, što schilajecca da viersii pra toje, što «heta fsbešnaja pravakacyja i fejk».
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary