«Vyśvietliłasia, što hrymiorka — heta miascovy ofis BRSM». J:Mors raskazaŭ, jak admianiŭ vystupleńnie ŭ Hrodnie
Frontmien hurta J:Mors Uładzimir Puhač raskazaŭ, jak adnojčy z-za BRSM daviałosia admianić vystupleńnie, chto ŭ hetym hodzie klikaŭ na karparatyŭ u Biełarusi i kolki byŭ samy vialiki hanarar.
U intervju jutub-kanału «ČiestnOK-LIVE» Uładzimir Puhač zhadaŭ, jak hrupa admoviłasia vystupać na kancercie da Dnia horada ŭ Hrodnie, jaki supaŭ z parłamienckimi vybarami.
«My pryjazdžajem na placoŭku ŭ Hrodnie. A tam visić — «BRSM. Sdiełaj svoj vybor». I vyśvietliłasia, što miesca, dzie ŭ nas hrymiorka — heta miascovy ofis BSRM», — raskazvaje Puhač.
Jon paprasiŭ arhanizataraŭ źniać raściažku, spasłaŭšysia na rajdar hrupy. «Nie toje, što my skandalim. U nas u rajdary prapisana — nie pavinna być rekłamy tytuniu, palityčnych łozunhaŭ. Ja kažu: «U nas u rajdary vy čytali. Kali łaska, źnimicie, ci my źjedziem».
Arhanizatary paabiacali vykanać prośbu, ale nie vykanali. Jak vyśvietliłasia, jany nie mahli sami heta zrabić biez zhody miascovych uładaŭ.
«Rašajuć niedzie ŭ vykankamie. My kažam: «Rabiaty, vy vyrašajcie, bo ŭ nas hadzina zastałasia. My ci hrajem, ci źjazdžajem». I siadzim u aŭtobusie prosta kala sceny. A heta centralnaja płošča. Pa toj bok — vykankam.
Vychodzić delehacyja ŭ halštukach i pinžakach. Iduć da nas. «Nu, Uładzimir, što nie tak? Nu vy ž usio razumiejecie». — «Nu, tak, razumiejem». — «Nu, tak što ž, nu?!» Ja kažu, što my źjedziem, nie budziem ihrać. Jany pajšli, ničoha nie źniali. My sabralisia i pajechali nazad», — raskazvaje Puhač i dadaje, što z boku arhanizataraŭ u ich adras paźniej byli pahrozy.
«My jedziem, i našamu dyrektaru zvonić načalnik hrodzienskaha BRSM i pačynaje pahražać: «Vy nidzie bolš ihrać nie budziecie». A ŭ nas užo 2006 za plačyma, my ŭžo ŭsio heta prachodzili. «Tak, tak. Dobra, davajcie», — i źjechali».
Samy vialiki hanarar
Uładzimir Puhač raskazaŭ, što samy vialiki hanarar, jaki jaho hrupa atrymlivała, byŭ u miežach 15 tysiač dalaraŭ. Ale kali heta było, jon nie pamiataje.
«Ja pamiataju, apošnija 10 [tysiač dalaraŭ] kali nam zapłacili. U 2020 hodzie».
Pa słovach śpievaka, było šmat vypadkaŭ, kali ich vystupleńnie na niejkim mierapryjemstvie «pradavali praz 25 ivent-ahienctvaŭ»: «My atrymlivali hanarar 3-4, a zakazčyk płaciŭ 15 [tysiač dalaraŭ]. Takoje taksama było šmat razoŭ, ale my hetaha nie viedali. Nas pierapradavali-pierapradavali, dadavali-dadavali».
Navat paśla taho, jak Puhač źjechaŭ u 2022 hodzie za miažu, jaho z hrupaj praciahvajuć klikać vystupić u krainie.
«Bolš za toje, navat u Biełarusi niejki bank u hetym hodzie sprabavaŭ nas na karparat zaprasić. Ludzi žyvuć u niejkim svaim paralelnym śviecie», — raskazvaje Puhač i zaŭvažaje: «Ja tolki rady. Źmianicie tam umovy, ja pryjedu».
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»33
Kamientary
Vystup u Moładzievym Chabie ŭ Varšavie byŭ fiejeryčny !
Pośpiechaŭ vam!
Utulnaść, uspaminy i najpryjemniejšaja atmaśfiera nadali nam mocy i pazityvu.
Da novych sustreč!