AAN i Brazilija praz Partuhaliju łabirujuć vyvad Huceryjeva i Hałavataha z-pad sankcyj
Jak stała viadoma «Našaj Nivie» z dypłamatyčnych krynic, Brazilija z šeraham afrykanskich krain pry padtrymcy niekatorych krain ES łabirujuć vyvad z-pad sankcyj asob, jakija kantralujuć zdabyču kaliju. Arhumient — «praduktovaja biaśpieka».
U Jeŭrasajuzie abmiarkoŭvajecca novy sankcyjny pakiet suprać režymu Łukašenki.
I choć pakiet maje na mecie zrabić bolš žorstkimi ekanamičnyja ŭmovy isnavańnia łukašyzmu praź sinchranizacyju sankcyj z rasijskimi, niekatoryja krainy ŭhledzieli ŭ samoj dyskusii ab sinchranizacyi mahčymaść prałabiravać svaje ehaistyčnyja intaresy.
Reč u tym, što, chacia mnohija śfiery ŭ antypucinskich sankcyjach i pakrytyja bolej, ale ekspart kalijnych i azotnych uhnajeńniaŭ z Rasii nie zabaronieny.
«Pad hetuju marku ad Arhanizacyi Abjadnanych Nacyj sychodzić dumka, što, kali sinchranizacyja, to treba dazvolić pradavać i biełaruski kalij. Łabirujuć hetuju temu Brazilija i niekatoryja krainy Afryki, niekatoryja krainy ES zhodnyja na heta. Naprykład, Partuhalija i Ispanija, jakija majuć tradycyjna ciesnyja suviazi z toj samaj Brazilijaj i inšymi krainami Łacinskaj Amieryki», — paviedamiła «Našaj Nivie» abaznanaja dypłamatyčnaja krynica.
Jak prapanujecca heta realizoŭvać?
Prapanujecca varyjant, pry jakim asoby, źviazanyja z kalijnaj halinoj, atrymajuć svajho rodu «adterminoŭku» ad realizacyi sankcyj.
AAN prasoŭvaje kandydatury rasijskaha miljardera Michaiła Huceryjeva i hiendyrektara «Biełkalija» Ivana Hałavataha. Abodvuch «puściŭ» u kalijnuju śfieru asabista Alaksandr Łukašenka.
«Majecca na ŭvazie, što jany pa-raniejšamu nie zmohuć pradavać ničoha ŭ ES ci ZŠA, ale zmohuć karystacca terytoryjaj hetych jurysdykcyj dla tranzitu hruzaŭ, atrymajuć mahčymaść razmarozić bankaŭskija rachunki i hetak dalej. Dla taho, kab pastaŭlać pradukcyju tudy, dzie nibyta jość niejkija prablemy z charčovaj biaśpiekaj. Rezka suprać hetaha vystupajuć Polšča i Litva, praź jakich, vidavočna, i maje prachodzić hety tranzit. Heta abnulić usiu raniejšuju sankcyjnuju rabotu. Susiedzi Biełarusi majuć namier błakavać hetuju prapanovu», — dadaŭ naš surazmoŭca.
Pra toje, što jość sprečki pa kalii, paviedamlałasia ŭ pačatku lutaha. Palityk Pavieł Łatuška tady kamientavaŭ, što prychilniki sankcyjnych sastupak abhruntoŭvajuć heta prablemaj charčavańnia ŭ śviecie.
Na hety momant usie pastaŭki kalijnych uhnajeńniaŭ ź Biełarusi praź jeŭrapiejskija party spynienyja.
Biełaruskija ŭhnajeńni pradajucca praz Rasiju pad vyhladam rasijskich, a taksama kantrabandaj traplajuć na rynki ES, ale abjomy značna mienšyja za tyja, što byli da sankcyj.
Prodaž kaliju — stratehičnaja niša dla režymu Łukašenki i amal adzinaja pazicyja sankcyj, jakuju na siońnia niemahčyma abyści.
Na pačatku 2022-ha, nieŭzabavie paśla napadu na Ukrainu, tahačasny brazilski prezident Žair Bałsanaru ździejśniŭ vizit u Rasiju i pacisnuŭ ruku Pucinu.
A niadaŭna abrany brazilski prezident Łuła da Siłva praciahnuŭ liniju papiarednika adnosna ŭkrainskaha pytańnia.
Padčas vizitu Ołafa Šolca ŭ Braziliju ŭ studzieni 2023-ha da Siłva adkazaŭ admovaj na zaklik niamieckaha kanclera pastavić Ukrainie jeŭrapiejskuju zbroju, jakaja jość u Brazilii. Bolš za toje, da Siłva vykazaŭsia, što «śviet maje mała infarmacyi ab pryrodzie kanfliktu».
Choć Brazilija i źjaŭlajecca vialikaj ekanomikaj i demakratyjaj, hetaj krainaj, jak i mnohimi ŭ Łacinskaj Amierycy, kirujuć papulisty, a ŭzrovień karupcyi ŭ krainie zastajecca vysoki.
Čamu dla Brazilii važnyja kalijnyja ŭhnajeńni? Brazilija — vialiki vytvorca sojevych baboŭ, jakija, u asnoŭnym, iduć na korm žyviole. 80% brazilskaha ŭradžaju vykuplaje Kitaj, reštu — jeŭrapiejskija krainy, u asnoŭnym Ispanija. Kalijnyja ŭhnajeńni ŭpłyvajuć na ŭradžajnaść i prybytki brazilskich kampanij.
«Naša Niva» — bastyjon biełaruščyny
PADTRYMAĆČytajcie taksama:
Čamu moh padvisnuć pakiet sankcyj suprać Biełarusi?
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie6
Kamientary
Zaśvietili vsiech, kto sidit na schiematozie biełkalija....
Pora uprazdniať OON, ili, kak minimum, hnať v šieju Hutieriuša iz OON, a Rośsiju iz SOVBIEZA OON....
Nu da, ukrainciev žie ubivajet Rośsija v Ukrainie, a nie v stienach OON....
Pora zakryvať i razhoniať etich krys i myšiej, a sozdať diejstvitielno diemokratičieskuju orhanizaciju orijentirovannuju na ČIEŁOVIEKA a nie oliharchov.