Łukašenka patrabuje praciahu represij: «Śviadomyja» — heta vorahi
Na sustrečy ź dziaržsakratarom Rady biaśpieki Alaksandram Valfovičam Alaksandr Łukašenka zrabiŭ pahroźlivyja zajavy.
«Usio bolš i bolš atrymlivaju infarmacyi, što tyja źbiehłyja i ich svajaki tut zalahli cichieńka, adlažalisia; siońnia razhortvajuć biznesy i prama kažuć pra toje, što, voś, my tut ciapier hrošykaŭ nakapić, a potym my tut zładzim buču.
A va Ukrainie ŭžo stvarajucca niejkija nie toje pałki, nie toje bataljony dla źviaržeńnia nie tolki ŭłady. Ale dla taho kab pieraviarnuć, adarvać Biełaruś i dałučyć da błoka NATA. Znoŭ chočuć novuju Ukrainu tut u Biełarusi stvaryć. Heta niedapuščalna. Ja pra heta kažu ščyra i adkryta. Kab viedali», — padkreśliŭ Łukašenka.
«Nam nielha supakojvacca. My ŭ hetym katle. Nam spakojna žyć nie daduć. Nas uvieś čas buduć cisnuć pa ŭsich napramkach. A hetyja «śviadomyja» — heta vorahi. Razumiejecie, heta ŭžo vorahi, kali nie razumiejuć, što adbyvajecca vakoł, i stvarajuć tut prablemy», — skazaŭ jon.
«Śviadomymi» Łukašenka nazyvaje svaich palityčnych praciŭnikaŭ, ludziej, jakija vystupajuć suprać sajuza z Rasijaj i dyktatury i šyrej — usich niazhodnych.
«Jany ŭvieś čas buduć krucić-mucić i padkidvać nam hetyja pytańni. A potym u patrebny momant znoŭ pojduć hramić, bambić, ździekavacca ź ludziej», — dadaŭ Łukašenka.
Heta chłuślivaja zajava. U 2020 hodzie pratestoŭcy ničoha nie hramili, heta byli absalutna mirnyja pratesty z patrabavańniem sumlennaha padliku hałasoŭ i adnaŭleńnia kanstytucyjnaj zakonnaści.
«Kali my z Rasijaj, značyć, my z Rasijaj, — zajaviŭ Alaksandr Łukašenka.
— My stvaryli abaronnuju prastoru, u nas supolnyja ŭzbrojenyja siły faktyčna, naša armija na vastryi. Dziejničaje rehijanalnaja hrupoŭka. I chaj nichto tam nas nie krytykuje i nie robić z hetaha niejkich ci to fejkaŭ, ci to nadzvyčajnych zajaŭ, što «ach, och, tam voś Łukašenka, rasijskija vojski dy inšaje». A što tut dziŭnaha? My daŭno pra heta zajavili. Užo, napeŭna, hadoŭ 20, jak my damovilisia pra heta».
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie6
Kamientary