«Čuli, jak kryčała: «Ratujcie! Zabivajuć!» Što viadoma pra žančynu, čyje pareštki znajšli ŭ Śvisłačy
Apošni raz susiedzi bačyli 37-hadovuju Juliju ŭ pačatku śniežnia. Kali žančyna pierastała vychodzić z kvatery, tryvohu nie zabili: minčanka časta ładziła šumnyja viečarynki, tamu vyrašyli, što jana niedzie adznačaje śviaty, piša Tut.by.
— Tak, heta kvatera, dzie ŭsio adbyłosia, — kažuć žychary doma pa vulicy Ramanaŭskaja Słabada ŭ Minsku.
Žaleznyja dźviery apiačatanyja, na padłozie valajucca palčatki ekśpierta, miarkujučy pa vonkavym vyhladzie dźviarej, pierš čym patrapić unutr, ich daviałosia vybić. Jak raspaviadajuć susiedzi Julii, učora ranicaj spačatku pryjechała milicyja, cikaviłasia, jak daŭno bačyli žančynu z treciaha paviercha. Akazałasia, u pačatku śniežnia. Paśla taho, jak u kvateru patrapili praz akno ratavalniki, i vyjavili tam cieła, stali vybivać dźviery.
Nahadajem, padčas ačyščalnych rabot 2 studzienia kamunalniki dastali ź Śvisłačy spartyŭnuju sumku z kancavinami čałavieka. Paźniej pravaachoŭniki paviedamili, što heta pareštki žančyny. Milicyja apublikavała fota znojdzienaj u Śvisłačy sumki i prasiła dapamohi ŭ vidavočcaŭ ŭ pošuku jaje haspadara. 5 studzienia asobu zahinułaj vyśvietlili. «U chodzie apieratyŭna-vyšukovych mierapryjemstvaŭ u kvatery adnaho z damoŭ, raźmieščanych na vuł. Ramanaŭskaja Słabada, supracoŭnikami orhanaŭ unutranych spraŭ vyjaŭlena cieła 37-hadovaj žančyny, astanki jakoj raniej byli znojdzieny ŭ race Śvisłač», — paviedamili ŭ SK.
— Samaje strašnaje: žyvieš pobač i navat nie viedaješ, što tam za dźviaryma. Nijakaha pachu na placoŭcy nie było, — kažuć susiedzi. Jany hatovyja razmaŭlać ale pry ŭmovie, što ich imiony nie buduć fihuravać u ŚMI.
— Śledčaja hrupa źjechała a hadzinie nočy, a my ŭsiu noč nie spali, voś. Chtości vyrašyŭ źjechać na daču, kab nie zastavacca doma, — dadajuć žychary doma, jaki raźmieščany ŭ histaryčnym centry horada.
Znojdzienyja pareštki žančyny ŭ Śvisłačy jany nijak nie źviazvali sa svajoj 37-hadovaj susiedkaj. Kali Julija pierajechała žyć u trochpakajovuju kvateru pa Ramanaŭskaj Słabadzie, našy surazmoŭcy dakładna skazać nie mohuć, «dzieści dva-čatyry hady tamu». Dziaciej u jaje nie było, z žančynaj bačyli to adnaho mužčynu, to inšaha.
— Pastajannyja hulanki, bojki, šum, hučnaja muzyka. Na hetuju kvateru nie raz vyklikali milicyju, — adznačajuć susiedzi. — Kali pryhledziecca, na dyvanku ŭ susiedziaŭ i leśvicy zastalisia kropli kryvi, jany paśla čarhovych viečarynak u Julii.
Ci pracavała žančyna, nichto nie viedaje, adzin čas kvatera, u jakoj jana žyła, zdavałasia jak luksavyja apartamienty za 5 tysiač rubloŭ u miesiac. Ale chto ich zdavaŭ, žychary nie viedajuć. U ahienctvie skazali, što bolš žyllo nie zdajecca.
— Uletku Julija žyła z adnym mužčynam, vosieńniu ŭ jaje źjaviŭsia inšy, Alaksandr. Niejak jana vybiehła na placoŭku, ruki byli ŭ kryvi, — praciahvajuć susiedzi. — 1 śniežnia ŭ kvatery znoŭ šum, kryki: «Ratujcie! Zabivajuć!». My vyklikali milicyju, pryjechała za ličanyja chviliny. Paśla hetaha Jula pierastała puskać u kvateru svajho sužyciela Alaksandra, ale jon usio roŭna pastajanna byŭ u padjeździe. 3 śniežnia jaho, pjanaha, zabrała milicyja.
Susiedzi apisvajuć Alaksandra jak maładoha čałavieka da 30 ŭschodniaha vyhladu.
Apošni raz Juliju susiedzi bačyli ŭ pačatku śniežnia, z taho ž času ŭ jaje kvatery spynilisia viečarynki. Kažuć, učora ŭ dom pa vulicy Ramanaŭskaj Słabadzie pryjazdžaŭ brat zabitaj žančyny, pa niepaćvierdžanaj infarmacyi, mienavita jon zabiŭ tryvohu.
Jak paviedamiła MUS, nočču 6 studzienia supracoŭniki ŭpraŭleńnia kryminalnaha vyšuku HUUS Minharvykankama pry siłavoj padtrymcy bajcoŭ śpiecpadraździaleńnia «Ałmaz» u Viciebsku zatrymali 26-hadovaha zamiežnika, jaki padazrajecca ŭ zabojstvie žančyny, astanki kancavinaŭ jakoj vyjaŭlenyja ŭ race Śvisłač 2 studzienia 2020 hoda. Pavodle jaho słoŭ, 28 śniežnia 2019 h. pamiž im i zahinułaj adbyŭsia kanflikt, u vyniku jakoha mužčyna zadušyŭ 37-hadovuju haspadyniu kvatery.
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»40
Kamientary