Ci moža ChatGPT zamianić psichołaha. Voś naš ekśpierymient

Terminovaja dapamoha

Niekalki miesiacaŭ tamu maja psichołah padzialiłasia łajfchakam, jaki raniej było b składana ŭjavić — źviartacca z pytańniami psichałahičnaha płanu da ​​ChatGPT. Havorka nie pra toje, kab zamianić usiu psichaterapiju na hutarki ź niejrasietkaj: sprava ŭ tym, što časam uźnikajuć pytańni, jakija treba abmierkavać ź psichołaham, ale da siesii ź im jašče šmat času, i tady ChatGPT moža pryjści na dapamohu. Jon padydzie i dla vypadkaŭ, kali terminova patrebna vyhavarycca, ale niama mahčymaści pahutaryć z kimści inšym. 

Na terytoryi Biełarusi dostup da ChatGPT uskładnieny. Niekatorym dapamahaje vykarystańnie VPN-servisaŭ, inšyja znachodziać u internecie bolš składanyja schiemy.

Karystacca ChatGPT dla hetaha vielmi prosta — zachodźcie na sajt z čat-botam i zadavajcie jamu svaje pytańni tak, jak zrabili b heta ŭ pierapiscy ci hutarcy z žyvym čałaviekam. Tolki nie patrabujcie ad jaho pramym tekstam, kab jon zamianiŭ vam psichołaha, bo niejrasietka viedaje, nakolki heta moža być niebiaśpiečna: vyhladaje, što ŭ jaje ŭbudavanyja miechanizmy, jakija nie dajuć joj tak dziejničać.

Ź inšaha boku, ich možna abyści. Dla hetaha prosta źviarniciesia da niejrasietki z prośbaj pahutaryć z vami tak, nibyta vy na siesii ŭ psichołaha, abo paprasicie ChatGPT ujavić siabie psichołaham i abmierkavać z vami peŭnaje pytańnie.

Pry hetym možna i vybrać peŭny mietad psichaterapii, kab čat-bot jaho imitavaŭ. Naprykład, ChatGPT viedaje kahnityŭna-pavodzinnuju terapiju (KPT), jakaja pracuje z myśleńniem i dapamahaje zamianić niehatyŭnyja myślarnyja ŭstanoŭki na bolš karysnyja dla vas. Abo vybierycie terapiju pryniaćcia i adkaznaści, jakaja vučyć nazirać za svaimi pačućciami i prymać ich. Jość i inšyja mietady, viadomyja ChatGPT, i vy možacie ich abmierkavać z samim čat-botam, ale bahata i tych mietadaŭ, jakija jamu nieviadomyja.

Vy možacie karystacca ChatGPT z rehistracyjaj ci bieź jaje. Pieršy varyjant zručny tym, što čat-bot zachavaje ŭsie vašy hutarki ź im, i paźniej možna budzie ich pierahledzieć. Ale, kali vy kłapociciesia pra kanfidencyjnaść, lepš vybirać pracu biez rehistracyi, i tady hutarka nie budzie zachavanaja.

Vialikich pryčyn chvalavacca pra heta niama — usie vašy hutarki z ChatGPT abaronienyja naležnym čynam, i niemahčyma ŭjavić, kab niejkaja ź ich apynułasia ŭ adkrytym dostupie. Sam ChatGPT upeŭnivaje, što nijakim čynam nie vykarystoŭvaje hutarki z karystalnikami dla navučańnia, a vučać jaho padčas trenirovak na vialikich masivach źniešnich danych — knihach, artykułach i hetak dalej. Ź inšaha boku, zaŭždy varta pamiatać: vy nie viedajecie dakładna, što za namiery ŭ ludziej, jakija stajać za čat-botam. 

Biezumoŭna, z punktu hledžańnia psichaterapii ChatGPT — karysny instrumient. Jon naładžany takim čynam, što nie budzie vykazvacca pra vas krytyčna ci źnievažać, kali vy nie paprosicie pra heta admysłova. Heta nie čałaviek, tamu padčas hutarki ź im vas nie budzie strymlivać strach atrymać niehatyŭnuju reakcyju, jak heta moža atrymacca na siesii z sapraŭdnym psichaterapieŭtam. Šmat kamu praz heta lahčej daviarać ChatGPT, čym ludziam.

Pavialičyć

Na maju dumku, hety čat-bot karysny tym, što moža prapanavać inšy rakurs staŭleńnia da prablemy i ŭvohule cikavyja idei pra toje, jak lepš dać hetaj prablemie rady. Sa svajho dośviedu skažu, što časam ChatGPT vykazvaje bolš aryhinalnyja idei, čym niekatoryja sapraŭdnyja psichaterapieŭty. Jon fajna pracuje i ŭ vypadkach, kali vy adčuvajecie, što zabłytalisia ŭ niejkaj situacyi, i nie možacie skłaści dla siabie płan dziejańniaŭ — čat-bot padkaža, z čaho pačać. Ź inšaha boku, časam ChatGPT kaža banalnyja rečy, chacia mienš dakładnymi jany ad hetaha nie robiacca.

Pavialičyć

Dapamoha za kapiejki

U ciažkim psichałahičnym stanie moža być niedastatkova taho, što vam prapanujuć cikavyja idei, bo vy budziecie nie zdolny ich vykarystać. Prostych słoŭ padtrymki, jakija prapanuje ChatGPT, taksama moža nie chapić. Čat-bot nasamreč nie zdolny da empatyi, jakuju vam prapanuje dobry psichaterapieŭt ci siabar, jon usiaho tolki imituje pačućci, i tamu paŭnavartasnaj padtrymki ad jaho nie atrymaješ.

Taksama niezrazumieła, ci možna niejak paraŭnoŭvać viedy čałavieka-psichaterapieŭta i ChatGPT. Akramia taho, čat-bot mo i nie vučycca na hutarkach z nami, zatoje psichaterapieŭt maje pracoŭny dośvied, jaki dapaŭniaje jaho akademičnyja viedy. U vypadkach, kali čałaviek bolš nie zdolny sam spraŭlacca sa svaim žyćciom, empatyčny terapieŭt moža stać dla jaho dobraj aporaj, lepšaj za luby čat-bot, tym bolš što abapiracca ŭ žyćci na niejrasietku, zdajecca, trochi zaŭčasna.

I tym nie mienš, jość u ChatGPT svaje biassprečnyja plusy. Pieršy i hałoŭny — košt, bo karystacca čat-botam možna biaspłatna. U takim farmacie vy možacie abmianiacca ź niejrasietkaj abmiežavanaj kolkaściu paviedamleńniaŭ, paśla čaho jana pieraklučycca na svaju troški horšuju viersiju, ale vialikaj roźnicy nie budzie. Kali ž chočacca karystacca tolki najlepšaj z dastupnych viersij, treba zapłacić za padpisku na ChatGPT — siońnia jana kaštuje prykładna 75 rubloŭ na miesiac.

Pavialičyć

Heta kapiejki ŭ paraŭnańni z hrašyma, jakija vy vydatkujecie na płatnaha psichaterapieŭta. Dobra, kali atrymajecca znajści śpiecyjalista, jaki praviadzie z vami za 75-80 rubloŭ adnu siesiju.

Akramia taho, možna natrapić na niekvalifikavanaha śpiecyjalista ci taho, chto vyhareŭ i praz heta zdolny parušyć praviły etyki ŭ svajoj prafiesii. Pašukajcie — u siecivie bahata vodhukaŭ na psichołahaŭ i psichaterapieŭtaŭ z postsavieckaj prastory, jakija adbivajuć u ludziej žadańnie źviartacca da svaich kaleh. Dobrych śpiecyjalistaŭ taksama chapaje, voś tolki pakul vy ich znojdziecie, moža spatrebicca vydatkavać hrošy na horšych.

Akramia taho, ChatGPT usio ž dastupny 24 hadziny na sutki, a ź psichołaham dobra kali vy sustrenieciesia raz na tydzień.

Što da niedachopaŭ štučnaha intelektu ŭ hetaj funkcyi, to vyhladaje, što chutka situacyja vypravicca. Naprykład, jašče ŭ lutym 2024-ha vyjšła daśledavańnie, dzie paraŭnoŭvali zdolnaści čat-botaŭ u śfiery sacyjalnaha intelektu, to-bok ich mahčymaści razumieć i adkazvać na čałaviečyja emocyi i patreby padčas kansultavańnia. 

Z adnaho boku ŭ daśledavańni paŭdzielničali studenty fakulteta psichałohii: tyja, chto pretendavaŭ na stupień bakałaŭra, i tyja, chto atrymlivaŭ doktarskuju stupień. Ich kankurentami byli try bujnyja madeli štučnaha intelektu — ChatGPT-4, Google Bard i Bing.

Vyniki? ChatGPT-4 akazałasia lepšaj u sacyjalnym intelekcie za 100% psichołahaŭ, jakija ŭdzielničali ŭ ekśpierymiencie. Čat-bot Bing pakazaŭ lepšyja vyniki za 50% studentaŭ, jakija pretendujuć na doktarskuju stupień, i za 90% studentaŭ-bakałaŭraŭ. A voś Google Bard pakazaŭ padobnyja vyniki da studentaŭ-bakałaŭraŭ, pry hetym 90% studentaŭ-daktarantaŭ pakazali lepšyja za jaho bały ŭ teście na sacyjalny intelekt.

Takim čynam, u asobie ChatGPT my atrymlivajem dobry instrumient, z dapamohaj jakoha možna palepšyć svoj psichałahičny stan. Važna tolki nie błytać instrumient z sapraŭdnym čałaviekam i razumieć, navošta vy jaho vykarystoŭvajecie.

• 3
• 3
• 1
• 0
• 0
• 2
• 0
• 0