Novaje daśledavańnie vyjaviła: kali ŭkazać u profili, što ty viehietaryjaniec, šancy na pośpiech padajuć. Čamu tak?
Raniejšyja daśledavańni ŭžo razhladali ŭpłyŭ roznych faktaraŭ na vybar partniora. Adnak dahetul amal nie vyvučałasia, ci ŭpłyvaje racyjon charčavańnia na heta. Adkaz, jak piša Daily Mail, pasprabavali adšukać navukoŭcy z Varšaŭskaha ŭniviersiteta.
Dla svajho daśledavańnia kamanda nabrała 404 udzielniki va ŭzroście ad 18 da 82 hadoŭ. Im prapanavali ŭjavić siabie karystalnikami dadatku dla znajomstvaŭ i acanić profili patencyjnych partnioraŭ. Profili byli čatyroch typaŭ. Try ź ich pradstaŭlali roznyja typy viehietaryjancaŭ: z etyčnych pryčyn, z ekałahičnych mierkavańniaŭ i dziela zdaroŭja. U čaćviortym nie było nijakaj zhadki pra charčavańnie.
Paśla prahladu kožnaha profilu ŭdzielnikaŭ pytalisia pra ich ahulnaje staŭleńnie da čałavieka, pra toje, nakolki jany hatovy byli b sustrakacca ź im i nakolki mužnym abo žanockim jany jaho ličać.
Vyniki, apublikavanyja ŭ časopisie Social Psychological Bulletin, pakazali, što viehietaryjancy ličacca mienš pryvabnymi ŭ jakaści patencyjnych partnioraŭ dla spatkańniaŭ.
«Ludzi z hrupy, jakaja nie mieła infarmacyi ab dyjecie, u cełym usprymalisia ŭ paraŭnańni ź viehietaryjancami bolš pazityŭna, jak bolš mužnyja (adnosna mužčyn) i bolš žanockija (adnosna žančyn), i, takim čynam, bolš pryvabnyja dla ŭstupleńnia ŭ adnosiny», — pišuć daśledčyki.
Analizujučy vyniki bolš padrabiazna, vučonyja vyjavili klučavyja adroźnieńni va ŭsprymańni viehietaryjanstva pa roznych pryčynach. Najmienš pryvabnymi akazalisia tyja, chto staŭ viehietaryjancam vyklučna praz zdaroŭje.
Choć udzielnikaŭ nie pytalisia ab ich matyvach, daśledčyki miarkujuć, što ŭsio zvodzicca da žadańnia sustrakacca z adnadumcami.
«Pakolki ŭ daśledavańni prymali ŭdzieł tolki miasajedy, adnym z tłumačeńniaŭ atrymanych vynikaŭ źjaŭlajecca toje, što ludzi chočuć ustupać u adnosiny z tymi, chto prytrymlivajecca padobnaha ź imi racyjonu charčavańnia», —
pišuć aŭtary i dadajuć, što heta adpaviadaje papiarednim daśledavańniam, jakija pakazali, što viehietaryjancy addajuć pieravahu ŭstupać u ramantyčnyja adnosiny ź inšymi viehietaryjancami.
Takim čynam, kali tvaja meta — maksimalna šyroki vybar partnioraŭ, lepš nie zhadvać svaje pieravahi ŭ charčavańni ŭ profili. Ź inšaha boku, zhadka pra heta moža dapamahčy adrazu adsiejać nie tych ludziej.
Navukoŭcy spadziajucca, što ich daśledavańnie stanie šturškom dla dalejšaha vyvučeńnia ŭsprymańnia viehietaryjancaŭ.
«Daśledavańni stereatypaŭ ab viehietaryjanstvie i jaho suviazi z maskulinnaściu mohuć dapamahčy lepš zrazumieć, čamu mužčyny mienš schilnyja stanavicca viehietaryjancami», — padsumoŭvajuć aŭtary.
Kamientary