Zapalenčyja pracesy mohuć być adnoj z pryčyn depresii. Hetaja hipoteza nabyvaje ŭsio bolš dokazaŭ i, mahčyma, u budučyni depresiju buduć lačyć z dapamohaj supraćzapalenčych preparataŭ.
Ad samych raspaŭsiudžanych psichičnych parušeńniaŭ, takich, jak tryvoha i depresija, ciarpić kala 25% nasielnictva Biełarusi. Va ŭsim śviecie — kala 280 miljonaŭ čałaviek. Ale pryčyny hetych stanaŭ dahetul zastajucca zahadkaj dla psichołahaŭ i niejrabijołahaŭ.
Šmatlikija daśledavańni mozhu vyjavili, što ŭ pracesach, źviazanych z emocyjami, uznaharodaj i kahnityŭnaj apracoŭkaj, adbyvajucca parušeńni, ale ich tryhiery zastavalisia niezrazumiełymi.
Jak piša Tadesspiegel, praryŭ u razumieńni adbyŭsia dziakujučy vypadkovaści. Daktary zaŭvažyli, što ŭ pałovy ankałahična chvorych pacyjentaŭ depresija ŭźnikała paśla lačeńnia interfieronam-alfa. Hety preparat stymuluje vypracoŭku śpiecyjalnych rečyvaŭ (cytakinaŭ), jakija aktyvujuć imunnuju sistemu dla baraćby z rakavymi kletkami.
Heta pryviało daśledčykaŭ da hipotezy: mahčyma, lišak cytakinaŭ jakraz i vyklikaje zapaleńnie ŭ mozhu i pravakuje raźvićcio depresii.
Daśledavańni paćvierdzili: u mnohich pacyjentaŭ z depresijaj u kryvi pavyšany ŭzrovień zapalenčych markieraŭ. Ale zastavałasia niezrazumiełym, źjaŭlajecca zapaleńnie pryčynaj depresii, ci heta prosta jaje nastupstva.
Kab pravieryć hetu hipotezu, vučonyja ź Instytuta miedycynskaj psichałohii i imunabijałohii pavodzin Univiersiteckaj balnicy Esena praviali ekśpierymient: zdarovym dobraachvotnikam uvodzili nievialikuju dozu bakteryjalnaj malekuły, jakaja vyklikaje zapaleńnie. Užo praź niekalki hadzin u ich uźnikli depresiŭnyja simptomy, jakija chutka prachodzili. Heta paćvierdziła, što zapalenčyja sihnały mohuć pravakavać depresiŭny stan navat u zdarovych ludziej.
Jak tłumačać vučonyja, takaja reakcyja — heta adaptyŭny miechanizm. Padčas chvaroby arhanizm pieraklučajecca ŭ režym enierhaźbieražeńnia, kab nie padviarhać siabie dadatkovym ryzykam. Zvyčajna paśla vyzdaraŭleńnia nastroj lepšaje. Ale kali zapalenčyja pracesy stanoviacca chraničnymi, hety miechanizm moža pryvieści da praciahłych depresiŭnych simptomaŭ.
Imunapsichijatry, jakija vyvučajuć uzajemasuviaź imunnaj i niervovaj sistem, upeŭnienyja: zapaleńnie adyhryvaje pryčynna-vynikovuju rolu, prynamsi ŭ niekatorych vypadkach depresii. Heta taksama moža rastłumačyć, čamu zvyčajnyja antydepresanty nie pracujuć ci pracujuć niedastatkova ŭ traciny chvorych.
Takaja imunnaja depresija moža być vynikam virusnaj infiekcyi, naprykład, hrypu, karanavirusu ci hiepatytu S. Analiz danych žycharoŭ Danii, dzie viadziecca centralizavany zapis historyi chvaroby kožnaha, pakazaŭ, što ŭ tych ludziej, jakija pierachvareli na karanavirus, a paśla ciarpieli ad depresii ci inšych psichičnych zachvorvańniaŭ, u dva razy bolš za siaredniestatystyčnaha žychara.
Jak naradžajecca imunnaja depresija
Vučonyja tłumačać miechanizm uźniknieńnia imunnaj depresii. Usio pačynajecca z taho, što padčas infiekcyi imunnaja sistema vydzialaje zapalenčyja malekuły-miesiendžary (cytakiny), jakija zapuskajuć imunny adkaz. Kali infiekcyja ciažkaja, jon moža być vielmi mocnym i spravakavać utojenyja zapaleńni ŭ arhaniźmie i mozhu. U vyniku źnižajecca vypracoŭka važnych niejramiedyjataraŭ, takich jak sieratanin, dafamin i noradrenalin, jakija rehulujuć nastroj.
Akramia taho, zapalenčyja sihnały ŭzmacniajuć vykid kartyzołu — harmonu stresu. Heta admoŭna ŭpłyvaje na rost niejronaŭ i ich suviaziaŭ (sinapsaŭ), parušajučy ich uzajemadziejańnie. Pacyjenty adčuvajuć «tuman u hałavie», majuć ciažkaści z pamiaćciu, navučańniem i adaptacyjaj — typovyja prykmiety depresii.
Hetyja pracesy zapuskajucca, kali zapalenčyja sihnały pieraadolvajuć hiemataencefaličny barjer — achoŭny miechanizm, jaki adździalaje kryvianosnuju sistemu ad mozhu i pieraškadžaje praniknieńniu škodnych rečyvaŭ. Adnak sihnały mohuć dasiahać mozhu i praz błukajučy nierv, jaki źviazvaje orhany, takija jak lohkija, kišečnik i serca, z mozham. Heta dazvalaje zapalenčym sihnałam upłyvać na mozh navat biez pramoha zaražeńnia jaho tkanak.
Ci možna lekavać depresiju supraćzapalenčymi preparatami?
Pavodle daśledavańniaŭ, supraćzapalenčyja srodki mohuć dapamahčy niekatorym pacyjentam u jakaści dadatku da antydepresantaŭ.
Analiz 30 daśledavańniaŭ praciahłaściu ad čatyroch da dvanaccaci tydniaŭ z udziełam zvyš 1600 čałaviek, praviedzieny kitajskimi vučonymi, pakazaŭ, što takija preparaty, jak aśpiryn, ibuprafien, amieha-3 tłustyja kisłoty i navat niekatoryja antybijotyki, mohuć źnižać simptomy depresii, asabliva ŭ spałučeńni z antydepresantami.
Adpaviedna z vynikami daśledavańnia, hetyja preparaty mohuć palahčać simptomy depresii bolš efiektyŭna (u 52% vypadkaŭ) abo likvidavać ich (prykładna ŭ 79%), čym płaceba. Kali supraćzapalenčyja srodki ŭvodzilisia ŭ dadatak da kłasičnych antydepresantaŭ, efiekt byŭ jašče bolš vyjaŭlenym.
Adnym z dokazaŭ taho, što supraćzapalenčyja preparaty mohuć być karysnyja pacyjentam z depresijaj, stali ekśpierymienty z preparatami, dzie aktyŭnym rečyvam źjaŭlajecca kietamin. U toj čas jak zvyčajnyja antydepresanty pačynajuć pracavać tolki praź niekalki tydniaŭ, kietamin palahčaje simptomy ŭ pałovy pacyjentaŭ užo praź niekalki hadzin paśla ŭviadzieńnia.
Niahledziačy na šmatlikija pierśpiektyŭnyja vyniki, pakul niama dakładnych rekamiendacyj, u jakich vypadkach supraćzapalenčyja preparaty najbolš efiektyŭnyja. Vučonyja z Karaleŭskaha kaledža ŭ Łondanie ciapier pravodziać šyrokamaštabnaje daśledavańnie, kab stvaryć bolš dakładnyja i piersanalizavanyja padychody da lekavańnia depresii.
Kamientary