U biełaruskich lasach pajšli zimovyja apieńki. Jakija jašče hryby nie spužalisia pieršych śniehapadaŭ?
Pieršyja śniehapady zusim nie spałochali zajadłych biełaruskich hrybnikoŭ, a načnyja zamarazki nie prymusili ŭsich schavać nažy i košyki da viasny. Tyja, chto ŭparta nie choča zakryvać hrybny siezon i pry pieršaj ža mahčymaści zryvajecca ŭ les, jak pakazvajuć fotaspravazdačy ŭ tematyčnych čatach i supołkach, atrymlivajuć zasłužanuju ŭznaharodu. Dniami ŭ sacsietkach źjavilisia zdymki pieršych u hetym siezonie zimovych apieniek, piša Telegraf.news.
Fatahrafijaj cełaj siamji jarka-aranžavych hryboŭ, jakija ablapili vierbavy pień, ranicaj 23 listapada padzialiłasia ŭ supołcy «VKontaktie» «Hriby: Hribnyje vojska Biełarusi» Neli Jałovik ź Minska.
U tematyčnym telehram-kanale biełaruskich hrybnikoŭ udzielnica ź Pinska taksama padzialiłasia fota pieršych fłamulin, jakija vyleźli, niahledziačy na vypadańnie śniehu.
Niahledziačy na toje, što hety vid moža źbiantežyć niedaśviedčanych hrybnikoŭ, jon źjaŭlajecca jadomym i ličycca, što nie hublaje svaich smakavych jakaściaŭ, navat kali jaho prychopić marozam. Źbirać hety vid možna i ŭ zamarožanym vyhladzie i, jak zajaŭlajuć śpiecyjalisty, navat adtałyja hryby — sapraŭdny delikates, pakolki pa smaku nahadvaje dalikatnyja morapradukty.
Varta adznačyć, što ŭ zimovaj apieńki jość atrutny dvajnik. Tamu pry zbory hryboŭ u lesie varta zaŭsiody prytrymlivacca praviła: źbirać tolki tyja hryby, u jadomaści jakich upeŭnienyja na 100%. Kali vy sumniavajeciesia, lepš nie kładzicie hryb u svoj košyk.
Inšaj udzielnicy supołki «Hriby: Hribnyje vojska Biełarusi» Taćcianie Starkovaj u Minskim rajonie pierad vychodnymi pa-sapraŭdnamu pašancavała ŭ hetym sensie: jana sabrała cełych 1,5 kh fłamuliny, «zabiehšy na hadzinku pravieryć zimovyja hradki».
Zrešty, nie tolki fłamulinu prynosili hrybniki ŭ apošnija dni ź biełaruskich lasoŭ, jakija ŭžo prysypała pieršym śnieham. Mnohija vyrašyli ŭ hetyja vychadnyja «zakryć siezon» i padzialilisia apošnimi fotaspravazdačami — radoŭki samych roznych vidaŭ, vosieńskija apieńki, viešanki i navat dryžałki.
«Pryhažość, śnieh vakoł, łužyny ŭ lodzie, ź ludziej, akramia mianie — ni dušy. Pavietra ŭžo pa zimovamu śviežaje. Ale takoha i čakać nie moh: padzialonki, zialonki, apieńki. Usie ŭžo ledzianyja. Ale jašče bolšaj dla mianie niečakanaściu stała znajści ŭ listapadzie 2 lisički», — padzialiŭsia svaim ułovam pad zakryćcio siezona inšy ŭdzielnik tematyčnaj supołki ź Minskaha rajona.
Biełaruskaja palityčnaja emihrantka lacieła ŭ Hruziju na samalocie, jaki ekstranna pasadzili ŭ Iranie7
Kamientary