Prezident ZŠA Džo Bajden paviedamiŭ ukrainskamu kalehu Uładzimiru Zialenskamu, što Vašynhton pieradaść nievialikuju kolkaść rakiet dalokaha radyusu dziejańnia ATACMS dla dapamohi ŭ vajnie z Rasijaj, paviedamlaje NBC News sa spasyłkaj na troch amierykanskich čynoŭnikaŭ i pradstaŭnika Kanhresa, znajomych z chodam pieramovaŭ.
Krynicy amierykanskaha telekanała nie ŭdakładnili, kali mienavita Ukraina atrymaje ATACMS ci kali ZŠA publična abvieściać pra svajo rašeńnie pieradać hetyja rakiety.
Sa słoŭ surazmoŭcy NBC u Kanhresie, amierykanskija čynoŭniki dahetul abmiarkoŭvajuć typ i kolkaść rakiet, jakija buduć adpraŭlenyja va Ukrainu, dadaŭšy, što krainy Uschodniaj Jeŭropy ŭžo pieradali Kijevu značnuju častku svaich zapasaŭ uzbrajeńnia.
Jak viadoma, Kijeŭ daŭno prosić ZŠA pra rakiety ATACMS, što dazvoliła b Ukrainie nanosić udary na vialikuju hłybiniu ŭ rasijski tył. Hetyja patreby ŭžo častkova zakryli brytana-francuzskija Storm Shadow/SCALP, ale ZŠA nie śpiašalisia z rašeńniem uśled za Brytanijaj i Francyjaj.
Amierykanski apieratyŭna-taktyčny rakietny kompleks ATACMS pryznačany dla paražeńnia kropkavych naziemnych metaŭ, takich jak kamandnyja punkty, puskavyja ŭstanoŭki rakiet, abjekty SPA, vuzły suviazi i składy, raźmieščanyja ŭ hłybini abarony praciŭnika.
Kompleks składajecca z apieratyŭna-taktyčnaj balistyčnaj rakiety MGM-140B z maksimalnaj dalokaściu pusku kala 300 kiłamietraŭ u zaležnaści ad madyfikacyi.
Ukraina moža vykarystoŭvać ATACMS z puskavych ustanovak HIMARS i M270, jakija ŭžo znachodziacca na ŭzbrajeńni Uzbrojenych sił Ukrainy.
Aleksin i Tapuzidzis skončyli vajnu za tytuniovy rynak Biełarusi. Abodva prajhrali. A voś chto, zdajecca, pieramoh12
Kamientary