«Чаму пад выглядам трохпакаёвых кватэр сталі прадаваць двухпакаёвыя?» Блогерка крытыкуе рынак нерухомасці
Беларуска абураецца тым, якія кватэры са свабоднай планіроўкай сёння прапануюць.
У сваім тыктоку Яўгенія разважае пра свабодную планіроўку — варыянт забудовы, калі ўнутры кватэры няма ўнутраных сцен, а колькасць апорных сцен мінімальная. На думку дзяўчыны, такая планіроўка выгадная толькі забудоўшчыку.
«Чаму пад выглядам трохпакаёвых кватэр сталі прадаваць двухпакаёвыя? Вось гэтая свабодная планіроўка як бы ўнесла свае карэктывы, вы заўважылі? Забудоўшчык дае нам вялікую квадратуру, але ў гэтай квадратуры ты не пабудуеш трохпакаёвую!»
Далей дзяўчына паказала план такой кватэры — яго яна назвала ўбоствам:
«24 квадраты — калідор, 33 квадраты — вось гэты ўс*аты пакой, які ты не падзеліш ніяк! У цябе ў любым выпадку з такой планіроўкай будзе нейкая прахадная. І гэта прадаецца пад выглядам класнай трохпакаёвай кватэры.
І тут спрадвечнае пытанне — навабуд альбо другаснае жыллё? Тая ж сталінка на фоне такіх планіровак выглядае выдатным варыянтам».
Акрамя калідора і вялікага пакоя, пра які сказала дзяўчына, у кватэры ёсць яшчэ спальня плошчай крыху менш за 14 квадратных метраў і кухня плошчай амаль 13 квадратаў. Санвузел у кватэры раздзельны — плошча яго частак складае 3,3 і 4,2 квадратныя метры.
Тыкток з развагамі дзяўчыны набраў больш за 125 тысяч праглядаў.
Тое, што праблема існуе, пацвярджаюць каментары — іх ужо больш за 300. Там шмат абурэння і прэтэнзій да сучаснай нерухомасці:
«Усе нармальныя людзі лічаць колькасць пакояў па колькасці ізаляваных памяшканняў. Кухня — гэта не пакой, нават калі там паставіць канапу і назваць гасцінай».
«Мяне вар'юе, што ў сучасных навабудах павялічаная кухня, ці, як яе цяпер называюць, кухня-гасціная, падаецца як яшчэ адзін пакой. Шукаеш трохпакаёўку, а там 2 пакоі + кухня».
«Дык яшчэ і балконы перасталі рабіць, ну лоджыі хаця б пакіньце, я не магу жыць без іх, без халоднай часткі кватэры зімой. Таму падчас пошуку кватэры адразу адсеялася 70% варыянтаў, практычна ўсе перасталі рабіць балконы і лоджыі».
Карыстальнікі прапануюць, як можна выправіць планіроўку ў такой кватэры. Адзін з варыянтаў — памяняць месцамі спальню і кухню і падзяліць прастору на тры пакоі. Таксама прапануюць перанесці кухню ў гасціную ці ўвогуле ў калідор, каб вызваліць пад іншыя патрэбы пакой, дзе цяпер знаходзіцца кухня.
Некаторым, аднак, падабаецца і цяперашняя планіроўка:
«Гэта трохпакаёўка. Адзін жылы пакой — мінімум 12 квадратных метраў. Тут можна з залы зрабіць 2 пакоі. Проста забудоўшчык так прадае — відаць, попыт».
«Накід на вентылятар! У мяне еўратрохпакаёўка, зала-кухня 25 квадратаў. Вельмі зручны фармат. Можна аддзяліць кухню, але навошта? Гэта ж прыгожа і вельмі зручна!»
«Наша Нiва» — бастыён беларушчыны
ПАДТРЫМАЦЬ
Каментары