Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»
7.02.2025 / 14:45
Učora HUBAZiK pakazaŭ mužčynu, jakoha, jak śćviardžajuć siłaviki, zatrymali paśla ŭzłomu dostupu da bota prajekta «Biełaruski Hajun». Heta supracoŭnik Mazyrskaha naftapierapracoŭčaha zavoda.
Maksim Nikicienka. Fota z sacyjalnych sietak
Pa źviestkach Digital Intelligence Team, zatrymanaha zavuć Maksim Nikicienka, jamu 42 hady. Jon z Mazyra. Viadoma, što ŭ 2006 hodzie jon słužyŭ u armii na terminovaj słužbie. Paśla hetaha pracavaŭ rabočym na roznych pradpryjemstvach u Mazyry.
U 2020 hodzie jon byŭ načalnikam tramvajnaha ŭčastka na Mazyrskim naftapierapracoŭčym zavodzie, pracavaŭ tam i na pačatak 2024 hoda, choć pasada nieviadomaja.
U Maksima jość žonka i dvoje niepaŭnaletnich dziaciej — syn i dačka.
Učora jahonaje fota źjaviłasia na kanałach HUBAZiK. Siłaviki śćviardžajuć, što hety čałaviek paviedamlaŭ u čat-bot prajekta «Biełaruski Hajun» niejkuju infarmacyju i heta jon padpisvaŭsia jak «ahient Valet».
Nahadvajem, 5 lutaha stała viadoma, što biełaruskija śpiecsłužby atrymali dostup da zakrytaha čata prajekta «Biełaruski Hajun» i zdoleli vyhruzić adtul usie paviedamleńni. U vyhružanych paviedamleńniach mahli ŭtrymlivacca ID telehram-akaŭntaŭ, pa jakich šmat kaho možna zdeananimizavać.
«Naša Niva» padrabiazna raspaviadała pra toje, što rabić, kali vy pisali ŭ čat-bot prajekta «Biełaruski Hajun». Hetyja rekamiendacyi sapraŭdy važnyja — pieračytajcie ich, kali vas ci vašych blizkich moža zakranuć hetaja ŭciečka.