Prahnoz Šrajbmana: paśla vybaraŭ represii źmienšacca
25.11.2024 / 14:45
Zapałochvańnie niazhodnych praciahniecca, ale kryminalnych spraŭ moža stać mieniej, ličyć Šrajbman.
Minsk, 2020. Fota: Celestino Arce NurPhoto via Getty Images
«Paśla vybaraŭ jość peŭny šanc na toje, što represii stanuć mienš intensiŭnymi», — vykazaŭ svajo bačańnie analityk Arciom Šrajbman u novym vypusku jutub-prajekta «Hadzińničak cikaje» i abhruntavaŭ svoj punkt hledžańnia.
«Pa-pieršaje, vyčerpvajecca prosta puł udzielnikaŭ pratestaŭ 2020 hoda, jakija jašče i nie represavanyja, i nie vyjechali, i nie patrapili ŭ pole zroku. Usio ž taki heta nie biaskonca (…).
Kaniešnie, jany mohuć chadzić pa svajakach biaskonca, padpisvać ludziej, jakija ŭžo siadzieli, [na kanały, pryznanyja dziaržavaj «ekstremisckimi»] i zatrymlivać. Ale zvyčajna takija rečy zakančvajucca administratyŭkaj. (…)
Ale ahulny trend — na źnižeńnie kolkaści kryminalnych spraŭ za masavyja akcyi. Naturalna, masavych akcyj niama. (…) Tamu kolkaść palitviaźniaŭ źmianšałasia b sama saboj, navat, kali b jon [Łukašenka] ich nie vypuskaŭ. Tamu što ludzi vychodziać, a novych nabirajuć nie ŭ takoj kolkaści».
Šrajbman źviartaje ŭvahu, što va ŭsie minułyja hady intensiŭnaść represij padšturchoŭvałasia elektaralnymi kampanijami:
«Refierendum, UNS, vybary ŭ «pałatku», zaraz prezidenckija vybary. My bačym chvali represij pieradvybarčyja. Prynamsi hetych chvalaŭ moža zrabicca mieniej. Naturalna, što bolšaść represij praciahniecca. Prosta voś takich, prymierkavanych da niejkaj daty, ich moža stać mieniej, (…) takich represij pa centralizavanym zahadzie pa rehijonach, pa kvotach. Ja dumaju, heta mahčyma».
Na represii, na pohlad, Šrajbmana, moža paŭpłyvać pačatak dyjałohu režymu z Zachadam pa palitviaźniach:
«Kali praces dyjałohu z Zachadam pa palitviaźniach pojdzie, to Łukašenka moža (prynamsi vizualna jany ŭžo heta robiać) pryhłušyć represii. HUBAZiK užo nie publikuje tak zvanyja pakajalnyja videa. Ja dumaju, jany mohuć pa inkamunikada niejki prahres zrabić. Dapuścić listy ci svajakoŭ. Nie viedaju.
Mnie zdajecca paślavybarčy čas prynamsi adkryvaje akno tut dla taho, kab pasprabavać na hetuju temu razmaŭlać, bo astatnija (akramia mihracyjnaha kryzisu) nie temy dla dyjałohu Łukašenki i Zachadu».
«Vierahodnaść taho, što represii źmienšacca da hetych vybaraŭ, była nulavaja. Paśla jana ŭžo vyšejšaja», — zaŭvažaje Šrajbman.