Cichanoŭskaja nazvała ŭdzielnikaŭ vybaraŭ u Kaardynacyjnuju radu «sapraŭdnymi hierojami»
28.05.2024 / 22:27
Śviatłana Cichanoŭskaja vypuściła admysłovy zvarot, pryśviečany vynikam vybaraŭ u Kaardynacyjnuju radu, jakija zaviaršylisia ŭčora apoŭnačy.
Fota: Ofis Śviatłany Cichanoŭskaj
Adznačyŭšy składanyja ŭmovy, u jakich adbyvalisia vybarčaja kampanija i hałasavańnie, Cichanoŭskaja adznačyła:
«Kožny z tych, chto ŭdzielničaŭ u vybarach — sapraŭdnyja hieroi. Ja hanarusia vašaj śmiełaściu i stojkaściu. Vy pakazvajecie ŭsiamu śvietu, što Biełaruś — heta nie tolki režym, ale i narod, jaki imkniecca da svabody i demakratyi. Dziakujučy vam upieršyniu skład Kaardynacyjnaj rady byŭ sfarmavany praz adkrytyja vybary».
Asobna jana adznačyła samaachviarnaść kandydataŭ u Kaardynacyjnuju radu:
«Ja hanarusia kožnym kandydatam, chto znajšoŭ u sabie mužnaść vyłučycca i zmahacca za našuju ahulnuju spravu. Niahledziačy na represii, abviaščeńnie ekstremistami i aryšty ŭłasnaści, hetyja ludzi praciahvajuć baraćbu».
Demakratyčnaja lidarka vykazvaje ŭpeŭnienaść:
«Kaardynacyjnaja rada pavinna stać placoŭkaj dla ŭzhadnieńnia našych ahulnych stratehij, dla dyskusij i kansultacyj, dla kaardynacyi kampanij, dla maksimalna zładžanaha farmavańnia bačańnia Novaj Biełarusi».
Adnačasova z hetym jana spadziajecca, što novy skład Kaardynacyjnaj rady praciahnie pracu pa ŭmacavańni adzinstva demakratyčnaha ruchu i što jahonaja dziejnaść stanie bolš publičnaj, a abmiarkoŭvacca ŭ radzie buduć pytańni, sapraŭdy aktualnyja dla biełarusaŭ pa roznyja baki dziaržaŭnaj miažy.