Śviet

Arhiencina prapanavała Brytanii viarnuć Fałklendy

Vajna za Fałklendy ŭ 1982 hodzie pryviała da sakrušalnaj parazy Arhienciny, što mieła vialikija nastupstvy.

Na fota arhiencinski krejsier «Hienierał Bielhrana» tonie ŭ paŭdniovaj častcy Atłantyčnaha akijana, 1 maja 1982 hoda, paśla taho, jak byŭ tarpiedavany Karaleŭskim vajenna-marskim fłotam Vialikabrytanii. Fota: AP Photo, File

Buenas-Ajres prapanavaŭ Łondanu viarnucca da pytańnia Fałklendskich vyspaŭ, padkreśliŭšy, što ličyć ich akupavanymi. Prezident Milej dapuskaŭ paŭtareńnie schiemy ź pieradačaj Hankonha, ale Brytanija admaŭlajecca, piša RBK.

Arhiencina hatovaja adnavić pieramovy ź Vialikabrytanijaj, kab znajści mirnaje rašeńnie sprečki vakoł Fałklendskich vyspaŭ jak maha chutčej, paviedamiŭ arhiencinski MZS.

Viedamstva padkreśliła, što ličyć vyspy niezakonna akupavanymi Vialikabrytanijaj z 1833 hoda, i nahadała, što ŭsie arhiencinskija ŭrady praciahvali nastojvać na svaim suvierenitecie nad hetaj terytoryjaj. Pazicyju Buenas-Ajresa padtrymlivali śpieckamitet Hienasamblei AAN, Arhanizacyja amierykanskich dziaržaŭ (AAD) i inšyja ŭpłyvovyja baki.

«Kanstytucyja vyznačaje, što adnaŭleńnie našaha suvierenitetu nad nazvanymi terytoryjami ŭ adpaviednaści ź mižnarodnym pravam i z pavahaj da ładu žyćcia ich žycharoŭ ujaŭlaje saboj pastajannuju i nieadjemnuju metu arhiencinskaha naroda», — adznačyli ŭ arhiencinskim MZS.

Novy arhiencinski prezident Chaŭjer Milej, jaki zaniaŭ hetuju pasadu ŭ siaredzinie śniežnia minułaha hoda, padčas vybarčaj kampanii nie raz zakranaŭ pytańnie Fałklendskich vyspaŭ. Jon padkreślivaŭ biassprečnaść suvierenitetu krainy nad imi i nieabchodnaść vyvučyć varyjanty ich viartańnia, pry tym, što «varyjant vajny nie źjaŭlajecca rašeńniem».

«U nas była vajna, jakuju my prajhrali, i ciapier my pavinny prykłaści ŭsie namahańni, kab viarnuć vyspy praz dypłamatyčnyja kanały», — tłumačyŭ Milej.

U intervju La Nacion jon prapanavaŭ płan viartańnia Fałklendaŭ pa anałohii ź pieradačaj Hankonha, jaki byŭ viernuty Vialikabrytanijaj Kitaju ŭ 1997 hodzie.

Ułady Vialikabrytanii adchilili prapanovy Mileja. U kancylaryi brytanskaha premjera nahadali, što pytańnie prynaležnaści vyspaŭ «niekatory čas tamu było kančatkova vyrašana», a Łondan praciahnie «aktyŭna abaraniać prava žycharoŭ Fałklendskich vyspaŭ na samavyznačeńnie».

***

Fałklendskija vyspy znachodziacca ŭ paŭdniova-zachodniaj častcy Atłantyčnaha akijana. Jany znachodziacca pryblizna za 12 tys.km ad Vialikabrytanii i 500 km ad macierykovaj častki Arhienciny. U krasaviku 1982 hoda na Fałklendskich vyspach vysadzilisia arhiencinskija vojski z metaj viarnuć ich, vajna doŭžyłasia amal try miesiacy, pieramohu atrymała Vialikabrytanija, a paraza ŭ vajnie pryviała da parazy dyktatury ŭ Arhiencinie.

U 2013 hodzie na hetaj terytoryi prajšoŭ refierendum, 99,8% vykazalisia za toje, kab zastacca častkaj Złučanaha Karaleŭstva. Buenas-Ajres admaŭlajecca pryznać vyniki hałasavańnia.

Čytajcie taksama:

Prezident Arhienciny palacieŭ zvyčajnym samalotam. I heta samalot «Biełavija»

Chaŭjer Milej aficyjna napisaŭ Pucinu i Si, što Arhienciny nie budzie ŭ BRIKS

U Arhiencinie vypuścili kupiury, jakija ŭ 25 razoŭ pieravyšajuć naminał raniejšaj samaj vialikaj

Kamientary da artykuła